Leyla Əliyeva "Nine Senses"də yeni ətir kolleksiyasının təqdimat mərasimində iştirak edib

"Nine Sense" incəsənət mərkəzində "Ətirşah" brendinə məxsus "Şah" adlı yeni ətir kolleksiyasının rəsmi təqdimatı keçirilib.

Tanınmış ictimai xadimləri, bloqerləri və ətriyyat üzrə mütəxəssisləri bir araya gətirən gecə yüksək ətriyyat və müasir incəsənət aləmlərini birləşdirərək, özünü ifadə etmək üçün unikal məkan yaradıb. Təqdimat mərasiminin fəxri qonağı Heydər Əliyev Fondunun vitse-prezidenti, IDEA İctimai Birliyinin təsisçisi Leyla Əliyeva olub.

Yaradıcılıq vasitəsilə ilham və mənaların sinerjisi

Qeyd olunub ki, tədbirin əsas mövzusu ətirlərin Leyla Əliyevanın yaradıcılığı ilə əlaqəsi olub. Brendin direktoru Cəlal Məlikov etiraf edib ki, xüsusilə onun bədii obrazı və dünyaya poetik baxışı kolleksiyanın əsas kompozisiyalarının yaradılmasına ilham verib. Təqdimat mərasimində Leyla Əliyevaya hörmət əlaməti olaraq iki ətir - "AzRose" və "An-Nahl" təqdim olunub.

Doqquz qoxu və doqquz duyğu 

Kolleksiyada ətirləri insan hissləri ilə əlaqələndirən doqquz unikal kompozisiya təqdim olunur. Hər ətir doqquz hissdən birini əks etdirir: görmə, dad, cazibə, təmas, istilik, eşitmə, tarazlıq, intuisiya və ümumi hiss (bütövlük hissi).

Görmə - "AzRose" (2024)

Xüsusiyyət: Unikal Zaqatala qızılgülündən istifadə olunur. Bu "uniseks" ətir gözlərimizlə qavradığımız gözəlliyin qoxu təcəssümünə çevrilib. Yuxarıda qeyd edildiyi kimi, ətir Leyla Əliyevanın "ROSE" əsərindən və ilhamverici yaradıcılığından ilhamlanaraq yaradılıb. Ətir şüşəsi Leyla Əliyevanın rəsmi ilə bəzədilib. Orada bitən çöl çiçəklərinin ən incə notlarından yaradılmış ətir. Təmiz hava, torpağın nəfəsi və təbiətin ruhundan doğan gül. Bu ətir Azərbaycan torpağının gözəlliyini bir damla ilə çatdırır: "Torpaqdan doğan incəlik".

Dad - "An-Nahl" (2025)

Xüsusiyyət: "Arılar" surəsinin ayələrindən ilhamlanıb. Arıların həyatını və faydalarını təsvir edən bu ruhlandırıcı Quran surəsi təbiətin mükəmməlliyini və həyatın daha dərin mənalarını açır. Bu ətir də Leyla Əliyevanın "Arılar" tablosundan ilhamlanıb. Onun balı xatırladan saf və yüngül notları təbiətin sadəliyini və gözəlliyini əks etdirir.

Quranın 128 ayədən ibarət 16-cı surəsi olan "Ən-Nəhl" insanları nemətlərə şükür etməyə və həyatın mükəmməlliyini dərk etməyə çağırır.

Cazibə və füsunkarlıq: "Azerbaijan Forest" (2019)

Təxminən 10 ildir ki, fəaliyyət göstərən klassik brend. Azərbaycanın əzəmətli meşələrini "hiss etdirən" kişi ətri.

Təmas - "OudAbad" (2024)

Kolleksiyanın ən dəyərli və orijinal ətri. Bazası İndoneziya ududur və kompozisiyaya, demək olar ki, fiziki olaraq hiss olunan heyvani xarakter təsiri yaşadır.

İstilik - "Phirni" (2023)

Qurman "uniseks" ətir. İsti südlü desertin qoxusu uşaqlıq nostaljisini və "Bəyin oğurlanması" filmindən səhnələri xatırladır.

Balans (Keçmiş və Gələcək): "Meysəri" (2023)

Meysəri kəndinin şərabçılıq ənənələrinə həsr olunub. Bölgənin tarixi ilə müasir inkişaf arasında tarazlığın simvolu.

Dəstək (İqtisadi Dəstək): "Azeri Light" (2023)

Neftin sabitlik simvolu kimi xidmət etdiyi kişi ətri. Heydər Əliyevin imzaladığı tarixi "Əsrin müqaviləsi"nə həsr olunub.

Eşitmə - "Sevgi" (2025)

Bu ətrin yaradıcıları məhsulu belə təsvir edirlər: "Qadınlar qulaqları ilə sevirlər". Sevgi - bu, dinləmə və anlama bacarığıdır. İncə "uniseks" ətirdir.

İntuisiya - "Kəklikotu" (2023)

Dağ kəklikotusunun kəskin, güclü xarakteri. Azərbaycan çay dəsgahı mədəniyyətinin əksi və həqiqətin müjdəsi.

Kolleksiyanı Kristiana Provensanonun "Feramon" (2019) ətri tamamlayır. O, beyni daim dəyişən, "ələkeçməz" qoxunu təhlil etməyə məcbur edir.

"Nine Senses" incəsənət mərkəzinin direktoru Natalya Jukova bildirib ki, ətirlə tanış olmaq həyatın ən parlaq və canlı təzahürlərindən birinə daha dərindən və dolğun toxunmaq imkanıdır.

Tədbirdə qonaqlar təkcə ətirlərlə tanış olmayıblar, həm də onların emosiya və sənət prizmasından təzahürünü hiss edə biliblər. Gecədə layihə üçün xüsusi olaraq hazırlanmış beş rəsm əsəri də təqdim olunub. Bu əsərlər qoxuların və hisslərin sintezini vizuallaşdıraraq mərkəzi ideyanı vurğulayır: ətir, sadəcə, bir qoxu deyil, həm də daxili aləmə və duyğulara aparan yoldur.

Yaradıcıların fikrincə, kolleksiyadakı hər bir ətir öz istifadəçisinin fərdiliyini vurğulamaq, onun şəxsiyyətinin davamına çevrilən qalıcı və yaddaqalan iz buraxmaq məqsədi daşıyır.

Ətriyyatçı Qoşqar Nurlu master-klas zamanı bütün qonaqlara öz unikal, imza ətrini yaratmağa kömək edib.

Ustad dərsi zamanı iştirakçılar parfümeriyanın əsaslarını və inqrediyentlərin peşəkar palitrası ilə işləməyi öyrəniblər. Ekspertin rəhbərliyi altında onlar kompozisiyanın strukturunu - yuxarı, orta və əsas notları araşdırıblar, müxtəlif aromatik akkordları necə birləşdirməyi öyrəniblər. Master-klasın sonunda qonaqlar fərdi ətir kompozisiyasından ibarət hazır şüşə və iştirak sertifikatı alıblar.

Məsələ ondadır ki, şirkət özünü, sadəcə, parfümeriya brendi kimi deyil, ətrin insanın daxili aləminin ifadə forması kimi dəyərləndirildiyi yaradıcı laboratoriya kimi təqdim edir.

"Nine Senses" məkanında keçirilən tədbir brendin fəlsəfəsini nümayiş etdirmək üçün ideal platforma olub: burada incəsənət, parfümeriya və hissiyyatın qavranılması harmonik şəkildə bir araya gəlib. Qonaqlar tədbirdən yalnız yeni təəssüratla deyil, həm də həqiqi ətrin eyni anda doqquz hissi oyatmaq gücünə malik olduğunu anlayaraq ayrılıblar.

Media.az Cəmilə Ələkbərova